Kak drukčije početi prve dane novoga nam leta nego z optimizmom i dubokom verom da se bu puno toga promenilo, da bumo v sečnju imali malo snežnoga ugođaja, da nesmemo misliti na sečanj kak „depresivni mesec“ i da sve ove velike promene koje nam dolaze z novom valutom buju završile na najlepši moguči način. Sečam se jedne lepe praktične izreke koja veli ovak: „Dok misliš da si došel do dna, imaš smo jedan izlaz: put prema gore“! Tak i treba. Leto nam je završilo z puno prelepoga glazbenoga ugođaja, bilo je puno druženja z familijom i pajdašijom i tak se bu nadam se i nastavilo. Pred nama je tristo šezdeset i pet (365) dana za okrenuti novu i lepšu stranicu našega života
Nova nada: 2023!
Kak sam i spomenul, svud oko nas je bilo jako puno prelepe glazbe, i moram iskreno priznati da sam baš užival. Ono kaj je na mene ostavilo poseban dojam su bila dva dokumentarca o jednoj jedinoj popevki: Tiha noć, sveta noć (Stille nacht, heilige Nacht). Prvi je v trajanju od vuru i pol obišel celi svet i pokazal nam kolko je ta jednostavna, uhu ugodna pjesmica osvojila sve narode sveta, prevedena na prek tristo jezika i kak isto tak prelepo zvuči na njamačkom, engleskom, hrvatskom ili na japanskom jeziku. Ta popevka ima dušu, ima ugođaj ima poruku koja svako ljudsko biče prima punim srcem. Pitam se kakav bi to čovek moral biti da ne oseti poruku te popevke ali se od navek pitam i jesu li ovi „veliki i močni“, koji vode ratove i čine zlo po svetu, ikad čuli tu melodiju i razmislili o njezinoj poruki? Čovek ne mora biti niti vernik da bi barem na čas osetil potrebu biti dio te prelepe priče, da oseti mir, dobro i ljubav.
Drugi je pak dokumentarac, več nekolko put viđen v to doba leta, priča o dvojici ljudi koje je spojil slučaj, čiji su se putevi morali sresti da bi napravili jednu pesmicu, čije vrednosti i večnosti nisu bili ni svesni. Kak to več biva v životu, na samome početku stvaranja nije bila ni prepoznata kak nekaj vredno i važno. Vu vremenu dok su orgulje bile jedini instrument koj je mogel dočarati ozračje crkvenih svetki. Izvedba te popevke na gitari je bila izvedena onak po skrivečki iza glavnog crkvenog obreda. Gitara je v to vreme (1818.) bila samo instrumnet birtije i „veseloga z vinom zagrijanoga društva“. No velike i vredne stvari nemreju za navek ostati zatajene. Popevka je izvedena prvi put 24. prosinca 1818., krenula je na svoj put osvajanja sveta. Njezini autori Joseph Mohr, tekst i Franz Gruber, glazba, postali su opče poznata imena svetske glazbe a da nisu nigda imali prilike osetili veličinu i važnost svoje popevke. Nisu jedini koje njihova okolina nije prepoznala na vreme.
Dragi moji. Znam da znate tu popevku, da ju i sami zapopevate, ali si dajte malo truda pa prečitajte celi tekst na originalnom njemačkom jeziku ali i na hrvatskom. Dobili bute još jednu novu sliku i tu atmosferu popevke „Tiha noć, sveta noć“. Morti baš taj tekst more biti i misao vodilja za celo sladeče ali i mnoga druga leta.
Želje v Novom letu
Zapraf neznam kaj bi penziči mojih let mogli zaželeti osim onih večitih želja: zdravlja i mira. Da se vrnem na jednu scenu dokumentarca v kojoj se ostareli veteran onoga Prvoga svetskoga rata seča jednoga neponovljivog i nestvarnog događaja z 1914. leta. V onoj bjedi i jadu rovovskog ratovanja, na Badnjak je na moment mirovalo oružje, a jedan se njemački časnik dosetil neverojatne stvari: zel je komad beloga platna, obesil na pušku i krenula z njom z rova. Dok je to videl jedan njegov istomišljenik z engleske strane, takaj je zel komad beloga platna, zapičil ga na bajonetu i krenul je v susret neprijateljskom časniku. Sledili su ih njihovi vojniki i na prostoru između dva ledena rova srela se poveča grupa miroljubivih neprijateljskih vojnika. Nije potrajalo dugo, topovi v daljini su prekinuli taj nestvarni prizor, koji se više nigda nije, a teško da i bu ponovil. Zadnja rečenica toga sečanja ostarelog veterana je glasila:“Da bi vojnik bio dobar vojnik nikad nesme voljeti svojega neprijatelja!“
Zadnji tjedan staroga leta je protekel v lepom famijiarnom okruženju. Na Božić smo Đuro i ja pripremili deci i vnukima jedan bogati tradicionalni obed v jednoj ugodnoj atmosferi. Kak i navek do sad smo malo preterali z količinama al verujte da smo sve iskoristili. Podelili smo dio glavnoga jela i kolače ali je naravno ostalo i za nas dosta onih drobnih kolači koje smo pomalo grickali celi tjedan.
Sl 1: Baka i deda i vnuki Tia i Jan za vremer božičnoga obeda
Štefanje smo proveli v najintimnijem mogućem društvu. Nas četvero je blagovalo u spomen pajdaša i rođaka Stjepana. Negda je to za našu klapu bila tradicija prek četrdeset let a sad je samo obed kakti podsjetnik na te dane. Njegova supruga, moja sestrična Zvjezdana i kčerka Jelena, su kak i zadnjih par let pripremile jedan prefini obed koj je protekel v sečanjima na neke prelepe događaje našega zajedničkoga života.
Za početak ovoga leta moram vas upoznati i z našom mačkicom, ljubimicom Mimi. Ima več par let kak je jadna i gladna dolutala v naše dvorište, Đuro ju je par put nahranila i do dana današnjega je ostala i postala naša ljubimica. Ona je naša maza i svojim prisustvom nam ispunjava našu svakodnevicu.
*Slika 2: Ovo je naša Mimi v trenutkima popodnevnog odmora
Nadam se da se nebute srdili kaj vam nebum sugeriral jelovni za ovaj prvi tjedan novoga leta. Prošli sam tjedan več napisal kak je zgledal tjedan između Božića i Novoga leta a verujte da bu tak slično i ovih nekolko dana. Sigurno bum imal na jelovniku ovak nekaj:
Juhe: bistra, kisela, prežgana i nekakav ragu.
Glavna jela: sarma svakak, dosta kuhanoga z nekakvim sosom, čušpajz z malo suhoga mesa i svakak nekakva domača testenina.
Desert:Mislim da kraj tolko drobnih kolači nebi trebalo peči još nekaj friško. Dobri buju i naši domači kompoti i sokovi z našega podruma. Za zimsko jelovnik dobro bu došla i koja vočka. Treba nam vitamina.
Još jemput Vam od srca želim jedno sretno i uspešno 2023. leto!
Vaš ivan944
:(Još nema komentara