A kaj da danas kuham? (600)

666. rođendan naše Koprivnice

Nek mi oprosti naš gradonačelnik kaj nisam došel na kavu ili čaj na njegov račun v centru grada, koj bu još neko vreme velko gradilište. Nisam baš kavopija, al k letu dok naš grad zablista v novome anjcugu sigurno se odazivam tom pozivu. Ljudi pomalo mrmljaju kaj se to tak dugo sve dela al bumo se još neko vreme strpeli jer se prek noči ništ velko i novo nemre napraviti. Bu još puno rođendana koje bumo imali prilike proslaviti na našem središnjem trgu a imali se bumo i z čim podičiti. Ono kaj me v ovom momentu jako veseli kaj v našem gradu ima i drugih gradilišta i još bu puno razloga za zadovoljstvo življenja v podravskoj metropoli. Kak stari, rođeni Koprivničanec znam negda i ja malo prigovarati ali me brzo prejde nezadovoljstvo i nekak mi je drago kaj bu mladi naraštaj, nadam se, imal prilike živeti i delati v jednom lepom modernom gradu. Jemput sam napisal kak je Koprivnica  za mene „grad za življenje po mojoj meri“ a tak mislim još navek. Malo me smeta kaj se moja vulica, skoro v samom centru grada, nikak nemre dokopati pravoga pešečnjaka makar je to v nekakvom planu več letima. Prvi smo susedi obnovljene Podravkine poslovne zgrade i okoliša  a ruku na srce baš se nekak ne uklapamo v taj okoliš. V događaje povodom dana grada več se letima uklapa i promocija novoga Podravskoga zbornika. Taj događaj pratim, skupljam primjerke toga štiva a eto več drugo leto imam prilike i ja dati svoje priloge. Dojdete v neka ozbiljna leta, puno toga pamtite, poznate puno ljudi starih Koprivničanci i nekak mislite da je vreme da se to negde i zabilježi. Prošlo leto sam pisal o mojem kvartu tam z pedesetih let prošloga stolječa a ovaj put sam imal prilike napisati tekstove o poznatim Koprivničancima koji su nas napustili tokom ovoga leta a svojim su delom zavredili i zadužili Koprivnicu i Podravinu. Naš kolega i prijatel Zlatko Imbriovčan, inženjer šumarstva i dugodišnji prvi čovek “Bilokalnika” i jedan od osnivača naše  Udruge “Gekoma”. Magistra Zlata Vucelić je legendarna Podravkašica koja je svoj celi profesionalni život provela v Podravki, rođena Koprivničanka jako angažirana i v društvenom životu grada. Treči je pak Ivan Stanišić Hans, dugogodišnji lider i gitarist nekoliko koprivničkih bendova z kojim sam nekaj let provel na pozornici v Koprivnici, v njegvom Đurđevcu, po hotelima severozapadne Hrvatske ali i na terasama nekolko jadranski hotela. Ljudi su to koje Podravski zbornik treba zabilježiti. Oni su svaki na svoj način obilježili povijest ovoga grada, ljudi z kojima sam puno toga podelil tokom svojega života.

Bilo je Martinje

Znam da sam pogrešil kaj nisam ovo napisal prošli tjedan al bute mi oprostili kaj sam malo pomešal datume.Uostalom ak kojekakve komercijalne priredbe moreju slaviti tjedan dana prije i posle zakaj se i ja nebi mogel malo zbuniti.

Ak i niste baš zaljubljeni vu goričke svetke sigurno znate da je prošli petek bil jedan od dva najvekša vinska sveca: Martinje! Kak bi to bilo da ja to ne spomenem i podsetim vas svako leto na tu tradiciju. To nije samo zapovedani vinski nego je i gastronomski događaj koj se v ovim našim kajkavskim krajevima obilježava od navek. Negda se to nekak obilježavalo daleko skromneše i intimnije v kleti među pajdašijom, da bi baš nekak za ove naše mlade države to bilo  komercijalizirano, javno i masovno. Nije mi žal kaj je to tak, nego nekak žal za mojom starom pajdašijom koja nemre više podeliti z nama ugođaj draganovečkih gorici. Oni buju svakak v našim mislima i nekolko kupici bumo kak i navek popili za pokoj duše “vu vinkel”. Kaj znači piti “vu vinkel” trebali ste videti kak to delaju Pepek i Česka. Kad več spominjem Česku bum zapisal par rečenica z njegve knjige  “Kak je v duši, tak je i v kleti”: „Vu severozapadni Horvacki svetkuje se i slavi po kletima, bertijama, hotelima, izletištima a i drugdi... A ve, po koprivničanskim, podravskim i horvatskim regulama, Martinje se obnaša drugač nek su Štatuti rekli. Makar je to prafzapraf  se skup “pajdaštvu za vugodu”. ... Na svojem skupu dne 11. studenoga (more den prije), leta Gospodnjega... gorički pajdaši temeljem nepisamoga zakonika o blagoslovu mošta kaj bu postal vino, v Martinjskoj noči donašaju svoj ZAKONIK,  o blagoslovu mošta vu vino iliti krštenju.

Celi zakonik ima čak 23 paragrafa z dodatkom celoga ceremonijala krštenja. Ak vam treba celi zakonik javite se. No znam ja da svi pravi goričari znaju onoga teskta koj veli:

Kumek moj dragi, daj se napi,
Dugo nas nebu, daj se ga vži.
Al isto tak  i onaj nezaobilazn stih
Došel je došel Sveti Martin
Vince je krstil ja ga bum pil,
Kupili bumo guskice tri
Vinčeko pili veselo mi.

Kad smo več pri guski red je da podsetim kakav je bil martinjski jelovnik. Nema tu  puno novosti z jednostvnog razloga kaj se tradicionalni martinjski jelovnik mora strogo poštivati. Barem kaj se tiče glavnoga jela.

No kak bi to bilo da naš dragi Atač kak veliki kreativac nebi neki dan predložil jednu veliku „novinu“. Razgovor je tekel ovak nekak:

“Čuj stari kaj nebi mi mogli malo promeniti jelovnik za Martinje?”
Kaj predlažeš?
“Mislim da bi mogli imati nekakve ribe?!”
“Dragi moj Atač. Pa znaš da na Martinje mora biti filana guska!”
A nebi mogli barem gusku nafilati z ribom (?!).
Valda vam je jasno da sam ostal bez teksta. Njegva kreativnost fakat nema granica.

No samo da vas podsetim kak zgleda naš jelovnik v zadnjih pedesetak let.

Kak smo sad več malo postareša gospoda v nekaj slabešoj kondiciji odlučili smo da to bu ovo leto martinjski obed. To pak znači se bum moral nekaj raneše diči i zakuriti peči kaj bi nam bilo v kleti ugodno toplo. Skupljanje bu od desete vure. To vam bu ovak zgledalo:

Aperitiv: Rakijica po izboru: šljiva, tropica ili pak travarica.

Hladno predjelo:Tu je bilo svačega a zaprak sve ovisi kaj ko donese. Bilo je naravno jegera, špeka i prgi.

Toplo predjelo: To je navek skromno. Podinstam samo guskinoga sitniša al verujte to neki od nas pojedu v slast. Nije gušt v mesu nego vu namakanju kruha v saftu.

Glavno jelo: Pečena filana guska, hajdinska kaša, šalata od friškoga zelja.

Desert: Tradicionalno imamo Krakojevu kuruznu zlevanjku. A piče? Tončov portugizec je več nekak standard a naravno gemišt za gemištaše. Mošt se uglavnom samo košta da se proceni kvaliteta mladoga vina.

Kak sam i rekel nismo baš v nekakvoj prevelkoj kondiciji al imamo Jana a on se je pobrinul da kak fiškuš podvori veterane kak se šika i patri. Verujte da treču smenu nismo dočekali.

Ovak zgleda guska dok se peče v goričkoj peči na drva

Pondelek

Juha/Glavno jelo: Kisela juha od želučeki z par kockici krumpira
Desert: Princeskrafli od jučer

Tork

Juha: Krumpirova juha
Glavno jelo: Svinjska lopatica v saftu, popečki od tikvice
Desert: Sok

Sreda

Juha: Jedna Podravkina z vrečice
Glavno jelo: Pileči rižoto, šalata   
Desert: Pita od sira

Četrtek

Juha:
Glavno jelo: Musaka od krumpira, turšija
Desert: Voče

Petek

Juha: Krem juha od mešanih semenki
Glavno jelo: Oslič ala bakalar
Desert: Čaša vina

Subota

Juha: Prežgana juha ze starim kruhom iliti krutonima.
Glavno jelo: Špagete ala francuski krumpir
Desert: Kompot od kruški

Nedela

Juha: Juha od goveđih kostiju z grisknedlima; ak su kosti malo „bogateše“ morete imati i toplo predjelo
Glavno jelo: Pohani krmenadli, pire, šalata
Desert: Diganci z pekmezom