Moj profil
A kaj da danas kuham? (544)
A kaj da danas kuham? (544)

A kaj da danas kuham? (544)

Mediji su puni kojekakvih vesti z naših gorica i polja i čoveku je sve to lepo videti makar sam pred desetak dana kukal kak je recimo podbacilo voče, bilo je premalo kiše i malo su navalile nekakve “čudne bolesti” ne samo na voče nego i na ukrasno bilje i tzv zelene ograde. To si bumo malo šenkali jer ima plodova koji nas buju itekak razveselili. Doduše onih desetak kišnih dana je iza nas, dok ovo pišem kiša je prestala, al su nam tamni oblaki još navek nad glavom. No za ovo kaj vam očem danas napisati lepo vreme baš i ni presudno. Pod strehom ili kraj tople peči v kleti se more takaj uživati i osladiti se z delicijama koje nam je podarila priroda.

Plodovi jeseni

Eto baš smo prošli tjedan, dan prije kiše, imali jedno retko okupljanje stare pajdašije, na kojem smo se prisetili nekih naših dragih prijatela, napravili si jedan skromni obed i naravno spekli kostanje. To su bili naši prvi ovoletnji kostanji i to po dvajst kuna a ne oni po 50-60 kuna koje si moreju priuštiti samo oni jako dubokoga žepa i oni nestrpljivi. Svojedobno ste mogli brati kostanje v šumi ak ste nekaj platili al se nadam da je ta bedastoča ukinuta. 

Staro društvo nakon obeda v jesenskom ambijentu

Mi v našem društvu imamo majstora za pečenje kostanji kojemu ni legendarni koprivnički kostanjar Koprek nije ravan. Naime kum Tinča je več letima naš kučni majstor za pečenje kostanji z kojim su posebno zadovoljne žene. (Nadam se da me niste krivo svatili?) On je odavno savladal tu veštinu tak da kostanja skoro netreba ni trebiti jer ih Tinča tak speče da ih morete gutati kak bombone a da si ne zmažete ni ruke. “Niki napor” rekel bi svojedobno jedan moj gitarista. Kak bu dugo trajala sezona kostanji bumo još vidli. Jan je najavil baki da bu išel brat ze svojom ekipom tak kaj bu mogla napraviti malu zalihu za kojekakve kolače. Opet zimnica. Samo da dečki ne zalutaju na tim našim bilogorskim šumama.

Negda je branje kostanja bila jedna prelepa razonoda za gimnazijalce. Sečam se da smo išli onak kolektivno brat kostanje po šumi na Bilogori  kaj je bil prelepi izlet. Puno smeha i zafrkancije po lepom jesenskom danu a bilo je i pravih prilika za upoznavanje kolegici z drugih razreda i naravno za kakvu kratkotrajnu simpatiju. Kakti za nagradu dobili smo svaki jednoga sendviča a na kraju akcije smo pekli kostanje na nekolko razboja. Problem je bil kaj nije bilo ni mošta ni pive za potjeru. Kostanji očeju jako presedati.

Tinča bolji od Kopreka

Neki dan gledam jedan prilog na VTV-u o beračima gljiva tam negde v Zagorju. Našli su se na istom poslu i oni kaj nekaj znaju o gljivama, oni kaj znaju malo al bome i oni kojima je samo do toga da se nadišu čistoga šumskoga zraka. Bilo je tu i nekakvih korisnih poduka za one jako oprezne dok su gljive v pitanju.  Među takvima bi bil i ja. Dogural sam do raspoznavanja vrganji, sunčanici, prsteki i divljih šampinjona koji znaju rasti i pri nama v goricama. Gljive su mi inače jako draga papica al naravno dok ih drugi naberu ili dok ih kupim pri proverenoj ženici na placu. Kak muzikant i Podravkaš sam znal neke prave birtije v kojima se na jelovniku moglo najti kojekakvih jela z gljivama. V jednoj delikatesnoj radnji v Opatiji su nudili kakti zakusku kisele gljive z nareskom i sirom. To bi nam negda došlo kakti zamena za doručak v hotelu na kojega smo retko kad stigli. Počastiš se jednom takvom bogatom platom i obed ti netreba. Po Istri su i negda nudili tartufe kak nekakvo čudo od gljive koja dela čuda baš muškome rodu. E sad jel to samo reklamni trik ili je to bil slučaj kak i z “muškom vodom” nauka još ni otkrila. Vama samo za informaciju. Tartufe danas ljudi beru i v Zagorju i v Slavoniji a kakav je njihov učinak v odnosu na istarske i to je do daljnjega nepoznanica. Dok smo pak išli na put prema Sloveniji bila jedna poznata birtija “Pri mamici” v kojoj se mogla pojesti  odlična kisela juha z gljivama. Takva juha dobro dojde i pravi je lek naročito drugi dan.

Za vreme studijskih dana došli su v modu šampinjoni v restoranu “Splendid” na Zrinjevcu. No moram vam reči da su me jako razočarali. Kak god bi ih pripremili falelo mi je začina i nekak su mi bili neftečni. Za razliku od tih restoranskih sečam se jedne zgode ze šampinjonima z našega koprivničkoga kraja. Naša vam je Podravka svojedobno počela uzgajati šampinjone v jednom napuštenom rudniku al je to jako kratko trajalo i seme je završilo na poljima na „Brijunima“ v koprivničkom predgrađu. I tak jemput idemo kolega Đuro i ja doma z goric i on predloži da idemo pogledati v kuruzu dal ima šampinjona. Ljudi moji to je trebalo doživeti. Kuruza se belela od gljivi i bil nam je problem kam ih deti. Nabrali smo za sebe a bome podelili i pajdašiji. Ono kaj sam štel reči: ti su šampinjoni bili čist nekaj drugo. Imali su i mirisa i okusa jer su ipak rasli na polju, na zraku, pod vedrim nebom. Vezano za gljive bum vam spripovedal jednu zgodnu anegdotu. Jedan je Podravkin radnik, nazovimo ga Miško, svojedobno bil velki poznavatelj terena i gljiva oko Borovljana i kak je imal navek viška znal je koju kilu i prodati. Onda je njegov direktor predložil da odu skupa brat gljive jer je bil siguran da je to najsigurneši način da se vrne z punim cekerom gljiva.  I Miško ga je fakat otpelal v šumu, našli su ove šumske plodove za jedan dobar obrok ali ništ bogznakaj posebno. Caka je bila v tome kaj ga je otpelal na teren gde je on pobral najbolši dio dan-dva prije a onaj drugi bogati teren je posetil drugi dan bez direktora.

Ovu priču bum zaključil z mojim dugogodišnjim iskustvom: ostajem pri onome kaj poznam a najbolši su mi ipak vrganji. Za puno ljudi to je klasika a među takvima sam i ja. Podinstani z jajcima, gulaš z malo krumpira ili kak dodatak dobrom saftu je za mene delicija. Ha čujte. Sigurno je sigurno.

MN: Musaka ala Đuro

Neki dan smo odlučili nakon dugoga vremena napraviti klasičnu musaku od krumpira. Ovaj recept, obečal sam ga prošli tjedan, čist je nekaj drugo a završil je kak improvizacija. Sve sam lepo pripremil od namirnica al se onda zmešala Đuro. Setila se da imamo jednoga patliđana i da bi mogli klasičnoj musaki od krumpira dodati i toga patliđana. Sad vam je to ispalo jedno drukčeše jelo, mogel bi reči da smo bili jako kreativni. Mogli ste primetiti da ja nigda ne dajem recepte al vam bum ovoga predložil ak se očete baš malo igrati i zgubiti malo više vremena nego dok delate recimo prežganu juhu.

Potrebne namirnice:

  • Pol kile krumpira skuhanoga v ljuski
  • 40 deka mlevenoga mesa
  • Jedan patliđan
  • Par šniti špeka
  • Dva deci vrhnja
  • Jedno jajce
  • Par žlici parmezana

Priprema:

Meso prodinstate, šnite patliđana koje ste prije posolili i pustili da odstoje, prepečete svaku stranu par minuta, vrhnje zmučkate z jajetom.

Na dno zamaščene posude složite pol narezanoga krumpira, rasporedite dinstano meso, posložite na to patliđane i završite z drugom polovicom krumpira. Na to posložite šnite špeka. Sve to zalijte z mešavinom vrhnja i jajca i posipajte z parmezanom. Porinite to v rol i nek se zapeče jedno dvadesetak minut. Gotovo je dok to jelo dobi onak lepu zlatno-žutu boju. Ak vam paše napravite si z tim nekakvu šalatu. Nebute požalili a i vaši doma buju zadovoljni.

Pondelek

Znate kaj je leberkoese? Po naški bi se to reklo mesni sir.
Juha: Prežgana juha z krutonima
Glavno jelo: Mesni sir na naglo, restani krumpir, šalata. Od mesnoga sira morete delati sve kak i ze šniclima: na naglo, pohani ili čak na lagani saft.
Desert: Imate sigurno kolača od jučer

Tork

Juha/Glavno jelo:Pileči rižoto z puno parmezana, zelena šalata; mesto piletine morete rabiti i gljive
Desert: Pita od jabuki

Sreda

Juha:Krem juha od žute tikve z krutonima
Glavno jelo: Pečeni krumpir na ploške “popločan” z nekolko šniti špeka, kiseli krastavci ili turšija

Desert: Čaša pive

Četrtek

Juha/Glavno jelo: Čušpajz od tikve, kranjske ili faširanci
Desert: Šnenokli

Petek

Juha/Glavno jelo: Gulaš/kisela juha od vrganji i malo krumpira; nemoraju biti baš vrganji al je z tim dobro podinstati malo pisanoga špeka
Desert: Čaša mošta

Subota

Juha/Glavno jelo: Špagete karbonara, mešana šalata; karbonaru delam navek na špeku, ili malo šunke, a dobro je najprije malo podinstati i luka.
Desert: Vočna šalata

Nedela

Juha: Juha od racinoga sitniša i povrča
Glavno jelo: Pečena raca, dinstana hajdina, šalata do friškoga zelja
Desert: Napravite pire od kostanja, dodajte šlaga i par kapi ruma

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.