A kaj da danas kuham? (529)

Picokijada i oko nje

V svojoj knjigi “Ko to ne voli Podravce?” sam nekaj napisal o Picokijadi z tih sedamdesetih let prošloga veka al vas bum podsetil na nepogodu koje ja pratila taj događaj kak da je naručena. Obzirom da ni bilo tak preciznih prognozi kak danas, organizatori su planirali dane vikenda tam krajem lipnja pa kak bog da. Onda nam se dve lete dogodilo  da pada kiša baš te dane. Ne da je bila kiša. To je bila ploha.  Prvi put su trebali popevati Marko Novosel i njegva Ervina Štelcl, v to vreme jako popularan par na našoj estradi. V jednoj prostoriji v Starom gradu imali smo celo popodne probu, sve lepo uvežbali i samo smo čekali večernji nastup. I onda je počelo. I kaj da vam velim? Nisu otpopevali niti jednu notu, mi nismo instrumente niti zeli v ruke i taj je dio programa završil. Sve se nekak odvijalo pod nekakvim improviziranim tendama i na svoje su došli samo zaljubljeniki v gemišt i pivu. Drugo leto se dogodilo nekaj slično. Gost je bil pokojni Kićo Slabinac z kojim smo uspeli provesti na pozornici morti pol vure. Kolko se sečam jedino se cela predstava o legendi uspela održati neposredno prije Kićinoga nastupa. Oču reči kak ste tih sedamdesetih let mogli biti sigurni v jedno: za vreme Picokijade morete z velikom sigurnošču reči da bu padala kiša.

Z vremenom se sve promenilo, Picokijada je narasla, letima tu velku predstavu režira odavno dokazani režiser Krešimir Dolenčić a glas o tome je odavno prešel granice Lepe Naše. Picokijada to i zavređuje.

Nekaj vam moram priznate makar me je malo sram kak čoveka koj piše o papici. Nikak se nemrem setiti kaj smo mi v to vreme zapraf blagovali te dane? Znam da je bilo sega al detalji se ne sečam. Zato sve pažljivo pogledam kaj se događa zadnjih par let. Kaj me to veseli?

Ak bi štel v jednoj kratkoj rečenici reči kaj se sve nudi na Picokijadi onda bi to ovak rekel: Tu se more videti sve bogatstvo Podravske kuhinje! Ljudi moji čega tu sve ima? Negda su naši stari znali reči dok bi negde bila dobra ponuda:Bilo je sega kaj na Božič! Ak ste nedavno vidli na VTV-u dokumentarac “Zaboravljeni recepti Podravine” onda ste sve to, pa i puno toga više, mogli videti ovo leto v Đurđevcu.

Mene navek oduševi dok vidim kaj sve Podravke znaju i moreju. Nemam dost mesta da vam nabrojim sve kaj se tam moglo videti al si dajte malo truda i vremena i prosurfajte na internetu i uživajte v slikama. Silne pogače, zlevanjke, diganci, prkači al i kojekakvi kolači filani z koječim. Saka Podravčica more bez problema iti peč kolače na svate. Sečam se da su se negda kolači za svate, naravno dok su se svati pripremali v prosincu i sečnju, pekli i pet-šest dana prije jer prkači moreju stati i mesec dana i tek su onda najbolši. O štruklima da ne govorimo. Svojedobno sam bil “jako srdit” kaj su se velki hvalospevi pisali o zagorskim štruklima, koji su priznati hrvatski proizvod, a ja sam siguran da bi naše ženice v jednom takmičenju v pečenju štrukli pobedile. I još sam v nekaj siguran. Dok se pripoveda o zagorskim štruklima uglavnom se pripoveda o štruklima sirom i eventualno bučnicom ze sirom. Mislim da je ponuda podravskih štrukli sigurno bogateša. Ovih je dana baš sezona štrukli z črešnjema, višnjama, tikvom, začas bu i z jabukama a ak se sečate moja Đuro dela i štrukle z kruškama. A tek štrukli zeljem?

Ono pak kaj mene zanima su naravno jela od mesa. Naravno da očekujem najviše kaj se se dela od piletine Kakva bi to Picokijada bila bez piletine?  Ja bi  sigurno najviše užival na programu pod nazivom “Picoki za piščoke”. Picek se more napraviti na sto načina i svakak bi kušal dobar paprikaš i pohance. Od malih nogu to je meni bilo najbolše i nek mi ljudi oproste al dok se spominju pohanci onda pohanom piceku nema para. Ak je još domači picek koj je zrasel v travi onda je to kvaliteta više.

Onda vam ja vidim da se kuhal i fiš paprikaš, kaj je takaj tradicionalno podravsko jelo, al nek mi organizatori ne zamere, ja bi navek na Picokijadi dal prednost pilečem paprikašu. Ak je moguče ja bi toga paprikaša zaštitil jer mislim da se to sigurno najbolje priprema v Podravini ili još precizneše v đurđevačkoj Podravini.

Videl sam i kojekaj drugo kaj čoveka vabi a posebno mi je drago kaj su v zadnje vreme Podravci đurđevačkoga kraja puno napravili v promociji vina. Svojedobno ste mogli iskati od Ludbrega do Pitomače vinogradara koj je vredan pažnje i teško bi ga mogli najti. Ni bil problem najti dobro vino v domačoj kleti al ono, kak bi ljudi rekli marketinški, Podravci su dugo spali. Bili smo malo i zavidni kaj su nas Međimurci, pa čak i Zagorci, več pred  fanj časa prestigli. Svojedobno ste recimo v puno koprivničkih birtiji mogli piti odličan gemišt z Turnašice i Aršanja al je to ipak bila čista rinfuza. Posebno se cenilo vino tam malo dalje z Vukosavljevice.

Da je na Picokijadi bilo i mužike najte ni sumljati. I tu je bilo sega. Malo sam se iznenadil da je v sklopu celotjednoga programa bil čak i koncert jazz fuzion benda al naravno da su tu bili i domači tamburaški bendovi bez kojih nema pravoga štimunga. No nek mi za kraj organizatori ne zameriju kaj bum malo zločest z jednim pitanjem: A kaj v srce Podravine na Picokijadi delaju:Belan, Bebek i Rozga? Znam ja da su jako popularni, da ih publika jako voli al ja kak stari, trdi Podravec nekak očekujem nekakav drugi glazbeni ugođaj. Morti drugo leto?

Aktivni i koprivnički vinari

Osim v Đurđevcu bila su i v Koprivnici dva vinska dogđaja na samo na dva-tri kilometra zračne linije. Pogledal sam malo slikice z Doma mladih i one ze Starigrada i vidim tu i tam neko poznato lice al i jako puno mladih koji su se hitili v ozbiljno vinogradarstvo. Tak ja vidim da se na četvrtom Wine Festu  okupila lepa ekipa vinoljubaca al među njima su i Robi i Brile.  Dva pajdaša koji se več jedno duže vreme kreču v tim vinskim krugovima. Nadam se da me niste krivo svatili. Robija znam kak klinca, sin je mojega pokojnog pajdaša Ive, asistiral mi je letima v Podravki pa je tak ostalo i do dana-današnjega. Za gorice za tatinoga života ni baš maril al eto z vremenom se sve promenilo i več koje leto ne samo da dela svoje gorice nego zna i meni pomoči i fizički al i savjetom. Na mladima svet ostaje i zakaj da mi stareši ne nafčimo i nekaj novoga i korisnoga. Prije samoga festa vidim da je bila i “Vinska konferencija” v našoj Galeriji kaj je jako dobro da se čuje nekaj pametno i korisno. Al moram nekaj pitati organizatore:”Zakaj Wine Fest?” Kaj nebi bilo dobro “Vu slavu vina” ili tak nekaj slično?

Zaljubljenici vu Frana Galovića i dobru čašu vina

Malo dalje v Starigradu se pak održala 18. Godišnja skupština Udruge vinogradara “Fran Galović” kojoj predseda Brile. Nisi ti Brile morti zalutal z Vlajslava čak v Starigrad? Na tome skupu osim toga vidim da je na sliki i Krako koj je takaj zalutal čak z one zapadne strane ze Sobotice. Onda vidim da niko ne spominje Draganovec makar smo mi od navek bili pravi centar koprivničkoga vinskoga druženja i uzgajanja plemenite kapljice. Zgleda da smo i mi Draganovčani malo zaspali.

Kak sam i najavil prošli tjedan, pakleno leto je počelo i pitanje je kak to preživeti i kak se hraniti da ne maltretiramo organizam z preteškim jelovnikom.

Pondelek

Juha/Glavno jelo: Čušpajz od tikve z hrenovkama
Desert: Znate da bu štrukli od jučer

Tork

Juha: Jedna Podravkina v vrečice
Glavno jelo: Kuhane kobase (moje ze škrinje), šalata od mahuni na maslinovom ulju z puno češnjaka
Desert: Šaka črešnji; to smo dobili valda zadnje ovogodišnje

Sreda

Juha: Koprova juha z krutonima
Glavno jelo: Zapečene palačinke filane z mlevenim mesom
Desert: Morti bu pasala čaša pivice?

Četrtek

Juha/Glavno jelo: Špinat, pohani kruh i dva jajca na oko po glavi ukučana
Desert: Sok i samo sok i to z frižidera.

Petek

Juha: Juha od škarpine; zmrznute naravno
Glavno jelo: Kuhana škarpina i blitva
Desert: Dajte ribi nek malo pliva v zdenoj bevandi

Subota

Danas bu samo
Juha/Glavno jelo: Juha od graška, mlade mrkvice i kašice; to smo imali i prošli tjedan pa nam se dopalo
Desert: Verojatno nekakav sok ili morti puding

Nedela

Juha: Pileči ragu
Glavno jelo:Pohana piletina, mešano povrče na putru
Desert: Štrukli z tikvom; KONAČNO!