Moj profil

A kaj da danas kuham? (530)

Moram vam nekaj priznati. Svibanj, lipanj, pak onda rujan i listopad su mi bili i jesu, kaj se meteorologije tiče, puno dražeši od srpnja jer se v ta četri meseca naprosto “lakše diše”. Doduše kak ste mogli videti, i doživeti skup z menom, ovo je leto lipanj pokazal srpanjsku čud, pa si nekak mislim da bu srpanj malo sve skup poravnal.

Zakaj ne volim srpanj?

Kak klinac sam srpanj zapamtil kak mesec velkih i važnih poljoprivrednih radova jer je baš v ovo vreme bila žetva i ljudi su bili na nogama od jutra do sutra. Naravno da govorim o onim vremenima dok ni bilo kombajna i žita su se žela ručno a mlatidba se obavljala za ono vreme modernim strojevima kak su traktor i dreš.Sve se je moralo požeti v par dana a mlatilo se po cele dane pa čak i po noči. Moji su starci imali nekaj malo zemlice koje je obrađival jedan naš bliski rođak z Ivanca a pri njemu doma se žito i mlatilo. Nije se moglo birati kad ti očeš to obaviti nego si se moral prilagoditi dok bu v dvorište mogel dojti “mator”. Tak se v dva navrata, dok sam još bil gimnazijalec, dogodilo da me stari digel oko treče vure v jutro, seli smo na bicikle jer se v oko četrte vure počelo z poslom. Sve bi to morti bilo i v redu da nisam došel doma malo prije nego je starome zazvonila vekerica. I kaj je onda mene zapalo od posla? Moral sam dodavati z parme snoplje pšenice onim pravim težakima ili pak odgrinjati plevu, nametati ju na šator i nositi v priparmič. Bila je jedna mala pauza za vreme koje bi ljudi pojeli kakvoga diganca i popili čašu vina i ponovo se hapili posla. Znalo je to trajati i do podne dok su težaki mogli konačno poiskati kakvo osveženje. Osveženje je skoro navek bilo korito vode v kojoj se moglo malo oprati i onda sesti za stol i nadoknaditi zgubljenu energiju. Mene v takvim momentima ni baš veselilo kaj bu  poslužena fina juha i, najčešče, domaća kuhana perad z nekakvim prilogom, kakvo pečenje i naravno čaša čistoga tuduma. Mineralne vode ili sode niti za lek. Ta je “tortura” trajala još leto dve  za vreme studija a moj je spas bil v tome kaj sam sva leta do povratka v Koprivnicu uglavnom provodil kak muzikant negde na Jadranu. No kak su starci vidli da od mene nigda nebu poljoprivrednik i oni su to malo zemlice brzo prodali.

Srpanj na moru i na vodi

Istini za volju  ni na moru me srpanj ni preveč zanimal. Ak sviraš četri-pet meseci na jednom mestu nisi baš lud za kupanjem kak oni “bokci” turisti koji dojdu na more desetak dana i moraju skoristiti svaku minutu. I na moru je lepše v lipnju ili rujnu. Zapraf mi na živce išla ona gužva na plaži a i ugodneše je sedeti negde v hladu, pomalo grickati kakvoga pršuta i sira i piti zdenu bevandu. Na moju velku sramotu moram priznati da mi se jedno leto v Poreču dogodilo da sam se celu sezonu okupal samo tri put i to na nagovor cure ili za nekakvu okladu. Fakat nisam znal ceniti tu lepotu i blagodat vremena na Jadranu.

Dok sam več delala mogli smo svirati samo mesec dana i to baš v srpnju dok smo mogli dobiti godišnji. No verujte i tih leta sam zadržal stare navike: što manje kupanja i kaj više hlada. Onda sam nekak ona leta pred rat i letima posle rata za godišnji biral drugu polovicu kolovoza pa čak i početak rujna. To vam je vreme obilja, pomalo popuštaju gužve, školska deca se moraju vrnuti doma i sve je nekak mirneše i opuštenije. Tak se sečam da smo jemput bili v Pirovcu početkom rujna, bilo nas je sve skup petnaestak z malom decom, pa je kuhar Pero kuhal po željama gostiju. Divota. Posebno se sečam jedne “kulinarske tradicije”. Kad god bi se kuhala goveđa juha na veliko bilo je tu i onih predivnih “bogatih kosti”. Kakti predjelo bi Pero v dvorištu iza kuhinje poslužil na jednoj velkoj taci kosti, narezal bi par šniti kruha i dodal sol i svakome noža. Osim mene tu su se još navek našla dva-tri zaljubljenika v tu deliciju. Posle blagovanja prvi je korak bil pranje ruki da čovek more posegnuti za čašom zdenoga gemišta.

A znate kaj? Ne mora čovek biti samo na moru da bi se mogel osvežiti. Kaj fali biti kraj slatke vode kak je na pr. naša Šoderica? Puno put sam se v ovoj kolumni setil kak je negda Šoderica bila pravo mesto za provesti vikend ili naravno celi godišnji kraj toga našega Podravskoga mora. Mislim da onima kaj imaju na Šoderici vikendice baš ništ ne fali. Puno zelenila, plaža vam je prek puta a kak vidim i čujem ima i nekaj ugostiteljskih objekti pa čak i kulturnih sadržaji. Kerekeš teatar več tradicionalno prek leta daje odlične predstave baš na Šoderici. Samo me nekak čudi kaj v obične dane ima jako malo ljudi na plaži. Neki smo dan išli prek Šoderice v Golu oko druge vure i morem vam reči da je na plaži bilo jako malo kupača. Verojatno je slika malo drukčeša prek vikenda. Razmišljam da prihvatim poziv mojega kumeka Tase da jedan dan skoknemo do Šoderice i v živo vidim kak to danas zgleda.

Razmišlja o još nečemu: Zakaj nebi čovek otišel recimo i na neku od naših predivnih reki kak su one ličke? Lika fakat nudi neotkrivenu prirodu a bome i kvalitetne domače proizvode koje teško morete najti v restoranima na Jadranu. Mene pak v zadnje vreme pomalo vleče Gorski kotar. Oni su jedan falačec Lepe Naše kojega bi stvarno trebalo posetiti i to baš sad v ovo letno doba. Pred par let sam delal v Begovom Razdolju negde krajem leta i morem vam reči da me je priroda i domača kuhinja oduševila. Hotel v kojem sam delal je pripadal jednoj familiji koja je imala i svoj OPG, kaj če reči da sve  kaj su mogli proizvesti mogli su ponuditi svojim gostima. Sečam se odličnih mlečnih proizvoda, kolači z borovnicom pa čak i domačih likeri od šumskih plodova. To vam je inače jedino naseljeno mesto v Lepoj Našoj iznad hiljadu metri a smešteno je kraj Mrkoplja na južnoj strani Bjelolasice. 

Dok ovo pišem pri nama je v Podravini ugodno osvežavajuče vreme jer je nočas opala kakva-takva kiša. Neznam jel bu to pomoglo ovoj žednoj zemli al smo barem jednu noč malo lakše spali prije najavljene nove žege. Kak smo se več danima nekak privikli na sparinjavu bumo mi i to pregurali. Moramo samo paziti da onih par betvi paradajza i paprike v goricama redovito zalevam jer bez toga se nebumo okusili povrča z našega “OPG-a”. Čovek uživa dok sam nekaj “proizvede” na svojih desetak kvadrata “vrta”.

Meni bu malo teško sledeča tri dana jer mi dolaze majstori koji buju roštanjili po krohu. Znate da to nemre prejti bez buke dok majstori menjaju letve, črepa i limove. Čovek to mora zdržati dok je takav posel. Nesmem se žaliti jer sam tri meseca čekal majstora da mi dojde i sretan sam kaj bu taj veliki posel dovršen baš nekak vu vreme dok bute vi ovo čitali.

Ono kaj je važno je dobro splanirati i prilagoditi jelovnika za ovo vreme. Nema tu nekakve posebne mudrosti. Nastavil bum z povrčem, ribom, voča ima v izobilju osim kaj imam jedan previd kojega moram ovih dana ispraviti. Naime v škrinji je još jedan suhi buncek koj nikak nesme dočekati sledeče koline. Lepo ga bum skuhal, ohladil, narezal na porcije i pomalo bumo imali recimo za gablec. Šnita bunceka, šnita kruha i jedan velki paradajz i imate dobar obrok. To bi mogel biti i obed ali ima jednu falingu: to bu jako žedno. No kak stručnjaki stalno preporučaju piti puno tekučine i taj bum problem lako rešil. Znate v kaj sam siguran? Barem još do kraja srpanja nebumo roštiljali jer stati kraj roštilja vuru-dve ni baš ugodno. Došlo bu vreme i za to tam v kolovozu i rujnu.

Pondelek

Juha/Glavno jelo:Hrenovke ili kranjske i zdela mešane šalate;sve to začinim z koščičnim uljem a onaj fini tekuči ostatak ili popijem ili potunjkam z kruhom. Čisti koncentrat vitamina.
Desert: Vočna šalata

Tork

Juha/Glavno jelo: Čušpajz od krastavci, faširanci
Desert: Zdena lubenica

Sreda

Juha: Prežgana juha z kašicom
Glavno jelo: Krmenadli na naglo, pomfrit, šalata od zelja
Desert: Nekakav sok

Četrtek

Juha: Paradajzova juha
Glavno jelo: Pileči rižoto z puno parmezana
Desert: Sigurno imate doma kakvoga keksa ili napolitanku a dobra bu i zdena voda

Petek

Juha: Povrtna juha
Glavno jelo: Pržene sardelice, krumpirova šalata
Desert: Jako retki gemišt

Subota

Juha/Glavno jelo: Rezanci z makom
Desert: Sok ili nekakvo voče

Nedela

Juha: Lagana teleča juha
Glavno jelo:Teleči medaljoni z povrčem
Desert: Pita z jagodama, kapučino

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.