Ovih se dana kojekaj događalo v našoj Podravini, oko mene i moje familije pa bum se osvrnul na te događaje. Imam i nekaj malo više vremena jer se v ovim paklenskim vremenima uglavnom zadržavam v malo hlada moje radne sobe i dnevnog boravka a jedini je izlaz tam posle šest dok idemo Đuro i ja zalijati ono malo vrta v goricama.
Oproštaj od cimera
Najte mi zameriti kaj bum danas počel z ovom tužnom temom. Prije tjedan dana napustil nas je Franjo Knežević Mico moj dragi cimer z onih predivnih studentskih dana. Tri je lete od mene mlajši al smo se nekak v jednom momentu našli dok smo tam krajem šezdestih bili v potragi za cimerom. Verojatno smo se našli v Studentskom centru za vreme onih redovitih okupljanja koprivničkih studenti. Ja sam v to vreme bil cimer z Benojem, takaj poznatim Koprivničancom, al kak je on naglo odlučil otijti vu vojsku, Mico se pojavil kak idealan novi cimer. Tu studentsku sobicu smo našli v Miramarskoj z koje nam je sve bilo na dohvat ruke: faks, Studentski centar i Glavni kolodvor. Osim toga smo stanovali pri jednoj familiji koja se par let prije doselila z Koprivnice pa smo se nekak osečali kakti doma. V to sam vreme sviral v poznatom studentskom domu “Cvetno naselje” tak da me je cimer navek pratil i znal se itekak naplesati jer se na tom plesnjaku znalo okupiti i do hiljadu plesača. I plesačica naravno. Dok je pak cimer išel prek vikenda doma znal je od moje mame donesti kakav dobar zalogaj za dva-tri obroka. Imali smo kojekakve zanimacije a jedna je bila zajedničko rešavanje križaljki. Ja bi v svojem krevetu imal otprtu križaljku i postavljal cimeru pitanje dok bi negde zapel. Recimo: reka v Podravini, pet slova zadnje je a? Zakaj smo to delali v krevetu? Ta zima 1967/68 je bila fakat jako hladna, gazde baš i nisu preveč ložili pa je bio preporučljivo biti pod toplim poplunom. V zimskim mesecima se je išlo z kuče samo nekaj pojesti ili skočiti do faksa. Onda se v našem studentskom životu pojavil još jedan tragač za podstanarskom sobicom: Andrija Pavlović Fjaka. V staroj sobici nismo nikak mogli stati trojica pa je bilo normalno da pronajdemo veči stan. I pronašli smo ga. Bil je to dvosobni stan v centru grada, v Tkalčićevoj na otprilike sto pedeset metri do glavnoga zagrebačkoga trga. To je bilo nezaboravnih leto dana druženja, bilo je tu kojekakvih zgoda i zgodica o čemu sam dost toga napisal na Coolinariki, na mojem blogu pod naslovom “Moji zagrebački kvartovi”. Ak bi moral izdvojiti najlepše vreme provedeno v Zagrebu za vreme studija mislim da bi to bilo baš tih leto dana provedeno z cimerima Fjakom i Micojem. Obadvojica su me napustila ali su se svojedobno sva naša sečanja na te dane vračala na gazdaricu Paulu, susedu Višnju Korbar, suseda Ekrema i na sve studente Koprivničance koji su jako rado navračali k nama na kakav dobar grah i piče. I ja se bum tebe navek rado sečal dragi cimer Mico.
Legradske hiže
Ovih je dana na mnogim internetskim stranicama kak senzacionalna vest bila prodaja hiži po jednu kunu v našem Legradu. Interes ni samo v Lepoj Našoj nego bome i v Rusiji, Ukrajini pa čak i v Ameriki. Ima tome fest vremena da se v Legradu nude jako jeftine hiže, neke su se mlade familije več i doselile, al ova je vest tek sad doprla do šire javnosti. Sad se ja pitam: “Pa zakaj se ljudi i nebi doselili v tak lepo mesto, negda gradič, koj more pružiti skoro sve kaj jedno mesto mora imati. Prelepi krajolik, takorekuć v dvorištu Mura i Drava, prelepa plaža koju treba malo doterati, Koprivnica na deset minut lagane vožnje a i v Mađarsku morete preplivati ak vam se baš oče. Poznam dost Legrađani i Legrađanki, naš dragi prijatel Čvrknja nas je za bivše države redovito pozival na “Pulj”, kaj če reči na takmičenje v gađanju glinenih golubi, jer je kakti član legradskoga lovačkoga društva bil svakoga srpnja jedan od organizatori. I moram vam reči da se tam navek dobro jelo. Članovi lovačkoga i ribičkoga društava su se onak bratski pomagali i mogli ste biti sigurni da bu kojekakvih delicija i od ribi i od divljači. Čak su se dosetili jadu kak sred leta imati zdeno piče. Nabavili bi ogromne komade leda, posložili vu jen veči vaštruk, dodali vode i nutra pohitali pivu, vino, mineralnu i po kojega soka. Kaj vam drugo i treba?
Znali smo navračati i v “Legrađanku” koju smo zbog naranđaste boje tende zvali “Naranđa”. Jedno vreme je jen domači čovek pekel odličnoga roštilja dok ga “dobronamjerni” meštani nisu počeli olajavati. Naime čovek je doma uzgajal nutrije pa su ljudi proširili glas da roštilja dela od toga mesa. Podravski jal. I tak je biznis propal.
Pred par dana je na VTV-u prikazan dokumentarni film “Zaboravljeni podravski recepti” koj je več mam na početku krenul z snimkom Legrada z visine i da znate da je slika bila baš prelepa. Šteta kaj je sam prilog o vrednim Legrađankama bil jako skroman pa i nismo mogli dobiti pravu sliku legradske gastronomije.
Zadnjih devet let nažalost idemo obavezno za Sesvete vužgati svečicu dragom pajdašu Čvrknji kojemu smo uz pomoč mnogih prijatela podigli grobeka na kojem stoji stih I.G. Kovačića: I nek niko ne dođe do prijatelj drag.
Nadam se da bu posle ove akcije prodaja hiži dobro krenula i da bu Legrad jedno jako interesantno i ugodno mesto za življenje.
Dva familijarna obeda
V samo dva dana u nam se dogodila dva familijarna obeda. Moje rođakinje Zvjezdana i Jelena su pripremile lakši obed za ove vruče lipanjske dane baš onak kak nutricionisti i meteorologi preporučaju na ovim afričkim temperaturama. Fakat nije vreme da se našpajzamo špeka i kobasici dok nam je več rano vjutro dvajst stupnjeva. Nije bilo nikakvoga aperitiva nego smo ze šalatom od šarenih šeri paradajzeki, mocarele i crnoga ulja popili po čašicu lepo ohlađenoga pjenušca. Za glavno jelo je bil losos ze šparogama i preljevom od kopra, kaj fakat nisam več dugo imal prilike blagovati. Z tim je pasala čaša vina a za desert zdeni šnenokli i kavica za one ovisnike o kofeinu. Dodatni “desert” su bili naravno kojekakvi razgovori o svemu i svačemu. To vam je tak dok se na vrpi najde bliska rodbina.
Losos ze šparogama i preljevom od kopra
Osvežavajuče predjelo od paradajzeki i mocarele
Drugi je pak obed bil čist nekaj drugo. Sve se održavalo v prirodi na imanju vu Vlajslavu gde i deca i stareši imaju dost mesta i zraka. Imate osečaj kak da ste na nogometnom igralištu bez gledatelja pa je i razmak od dva metra normalna stvar. Đurina vnučica Vita je imala prvu pričest i naravno da su roditelji pozvali blisku familiju, kumove i nekolko dragih prijatela. Kak je to več danas uobičajeno delal je ketering jer ruku na srce bilo bi fakat teško doma kuhati po toj vručini. Kaj je sve bilo na stolu verujte da mi je teško i nabrojiti al je siguran sam bilo koječega i za sve ljude pa i one zbirljive. Naravno da su sledili kolači i torta. Moram malo potračati i baku Đuru. Da ne dojde praznih ruki spekla je još doma lepu vrpu klipiči al ih je zaboravila na vreme deti na stol. No problem se brzo rešil: čim su došli na stol klipiči su i nestali. Klipiči se tak i tak jedu onak z nogu: v jednoj ruki klipič a v drugoj gemišt.
Kaj da vama preporučim za ovaj tjedan? Verujte da sam i ja na muki. Stalno kombiniram nekakvu žlicu, povrče i lakše meso i naravno puno tekučine. Kak je pred nama srpanj moramo se još malo strpeti do onih lepih kasnoletnjih i ranojesenskih dana.
Pondelek
Juha/Glavno jelo: Kisela juha od pilečega sitniša
Desert: Kuruzna zlevanjka z pekmezom
Tork
Juha: Juha od graška i mlade mrkvice
Glavno jelo: Omlet od šunke, mešana šalata
Desert: Sok
Sreda
Juha/Glavno jelo: Prisiljeno zelje z kranjskima
Desert: Puding
Četrtek
Juha: Povrtna juha
Glavno jelo: Musaka od kelja/patliđana
Desert: Morti vam paše čaša pive?
Petek
Juha/Glavno jelo: Oslič ala bakalar
Desert: Čaša retkoga gemišta ili čak lagana bevanda
Subota
Imam jednu Đurinu naruđbu koju moram realizirati naravno v goricama
Predjelo: Sirni namaz na tostu
Glavno jelo: Riba na roštilju; kuhani krumpir na putru; kakva bu riba bum znal dok dojdem na ribarnicu.
Desert: To znate i sami
Nedela
Juha: Juha od goveđega repa z kašicom
Glavno jelo:Kuhani repovi, zdela kuhanoga mešanoga povrča na maslinovom ulju
Desert: Sladoled
:(Još nema komentara