Moj profil

A kaj da danas kuham? (525)

Pred dost let sam već pisal na ovu temu no nekak me ovih dana pak nekaj povleklo da napišem kak na to gledam danas kak ozbiljan čovek. Prolazim ja tak oko četrte vure popodne kraj jedne od stotina koprivničkih pekari i vidim na papirima rozne, plave i bele boje velkim slovima napisamo AKCIJA...Nisam išel bliže da vidim kaj je sve na akciji al moram priznati da me to malo začudilo. Svakakve akcije moremo videti svakodnevno al da je došel na red i kruh i slične proizvode to mi nekak ni po volji. Morti bi peki nogli posle sedam navečr kruha podeliti zabadaf?

Kruh naš svagdašnji

Moji vršnjaki i oni malo stareši se buju setili kak je kruh bil velka stvar, kruh naš svagdašnji se od navek jako cenil jer bez kruha i vode nema života. Moram se malo vrnuti na moja prva sečanja na pečenje kruha pri baki i pri nama doma. Poznato je da su ženice na selu pekle kruha doma i to za nekolko dana iz čisto praktičnih razloga. Zašparale su na vremenu jer je pečenje kruha bil velki posel, a trebalo je i kuriti onu velku krušnu peč, a z druge strane imale su i kojekakvoga drugoga posla oko kuhanja, vrta, pranja veša ili se baviti z decom.Taj je kruh bil fakat jako dobar dan-dva al, najte mi zameriti, posle se je malo teško gutal. Onda se je lepo nadrobil vu prežganu juhu ili v mleko. Svojedobno sam napisal i ovo kaj sam nafčil od bake Jele: Dok je zvadila kruha z peči prekrižila ga je, odrezal jednu šnitu, dela ga na stol i onaj odrezani dio okrenula prema vratima kakti dobrodošlicu za nekog slučajnog gosta namjernika. Nekak mi se čini da više takvih obreda nema čak i dok ženice na selu pečeju kruha doma. Pri nama doma pak, tam pedesetih let prošloga veka, je bilo drukčeše. Imali smo jednu dost interesantnu kombinaciju z pečenjem kruha. Prva je bila pečenje kruha doma, druga je bila kupovanje v pekari na točkice, treča zamjena brašna  za kruh i četvrta, meni jako neobična, da mama zamesi doma velki vajdling krušnoga testa kojega nosimo onda k peku da nam ga on speče. Obično je to bil velki kruh za par dana. Mi smo ga nosili k Jajetiću, legendarnom koprivničkom peku v centru grada. Ono kaj je jako poučno za današnje generacije: kruh se nigda ni hital. Hititi kruha je bil velki greh i ne verujem da bi to napravili i oni koji nisu bili baš preveč pobožni.

Za kaj se kruh mogel i more sve skoristiti?

Kroz sva ova moja leta i kuharskoga staža od skoro pedeset let nekak si bum zel za slobodu da napišem koju reč o tome kak  iskorititi “kruh naš svagdašnji”. Svi dobro znate za one svakidašnje situacije v kojima konzumiramo kruha: za gablec, za obed i večeru. Neki v tome i preteruju pa jedu kruha iz testeninom i svim mogučim jelima gde imate brdo kojekakvoga priloga. Mi smo se doma nekak več pred fanj vremena deli v red. Ne jedemo kruha dok je za prilog krumpir, testo, povrče, nekakva kaša i sl. Čini mi se da bi neka jela z prilogom bila manje vtečna dok bi pojel z tim još i šnitu kruha. Kruha konzumiram uglavnom za prvi jutarnji obrok z kakvom kobasom, špekom, zdenim pečenjem, jajcima ili pak v zadnje vreme za večeru. Kak mnogi stareši ljudi rado pojedem šnitu kruha z putrom i pekmezom i poteram ze šalicom kiseloga mleka.

No rabim ga v mnogim jelima koja redovito imam na mojem jelovniku. Znate več da faširanci nejdu bez kruha i to pretežno z nekaj starešim kruhom kojega namočim v mleku. Dok vidim da mi je ostalo koja šnita kruha mam ga narežem na kockice osušim na tavi i tak more stati tjednima. To su tzv krutoni koji pašu v sve krem juhe, prežganu juhu, koprovu i slične.  Kak ste mogli primetiti da mi doma imamo zbog Đure i kruh z bezglutenskim brašnom kojega peče sama. Budite oprezni ak morate rabiti pecivo ili kruh od takvoga brašna. Skupo je kak dragi kamen.

Normalno je da od staroga kruha delate i zemerknedle jer ga tak i tak morate namočiti. Nemrete ni zamisliti nekakav saft od divljači ili od govedine a da vam z tim ne pašu ti knedli. Malo stareši muškarci se buju setili da su vu vojski jeli dost često poparu na koju su se uglavnom durili. Ja vam moram priznati, bez obzira kaj sam pomalo zbirljiv, da se to meni čak i zdopalo. Na kruh bi kuhari hitili šnitu sira i špeka i bilo je čist jestivo i kalorično. O pohanome kruhu sigurno znate sve. Ja staroga kruha spoham za gablec, jako paše ze špinatom i jajcima a verujte da ga morete poslužiti i kak prilog z kojekakvim saftima pa čak i z divljači.                                                                                                                               Negda davno smo kak deca jeli pajdašeke a znam da se i danas nekoje mame dosete jadu pa deci, koja nisu baš od velkoga apetita, delaju pajdašeke od kruha i nekakve salamice, kobase ili špeka. Samo da nisu tzv “novigradski pajdašeki”. Priča veli da su v Novigradu deci davali pajdašeke na kruhu ze špekom koj je bil zavezan z malo konca. Dok dete pocmuka kruha mama zvleče špeka i eto novoga pajdašeka z novim falačecom kruha.              No na tu temu ima jedan praktičan savet za goričare. Dok ostane malo više mesa od nekakvoga obroka ili roštilja a društvo se zasedne na partiju bele do kasno v noč, teško da bute opet poslužili celi obrok. Navek imate nekoga dežurnoga koj se recimo ne karta. Taj bu onda na jednoj večoj daski narezal meso i kruha na pajdašeke i ponudil od kartaša do kartaša. Verujte da posle dve-tri runde više nebu nikakvih ostanjki.

Ja sam se pak nedavno vrnul jednoj staroj naviki. Tu i tam si namažem na tostani kruh mast koja mi je ostala od kakvoga pečenja ili dinstanoga mesa. To vam dojde kakti meso z lodrice jer je fakat dobro začinjeno a morete mam popiti i čašu gemišta.

V krajnjemm slučaju od staroga kruha napravite prezle koje bute rabili za pohanje al i za kojekaj drugo. Neki kuhari recimo zgusneju fileke ili škampe na buzaru z prezlima.

Ponuda danas

Kak sam več i spomenul ponuda v nebrojenim dučanima i pekarama je ogromna. Jako sam oprezan z izborom. Testiral sam več nekolko vrsti kruha na nekolko mesta al nemrem reči da sam se baš z nekojim oduševil. Em se mrviju več za večeru, em neki nisu dopečeni, em sam prečital da uvozimo nemoguče količine zmrznutoga kruha kojega naši vrli trgovci u nekim velkim trgovačkim centrima samo odmrznu i speču. Vele dobro vpučeni da imamo lepu ponudu uvezenoga zmrznutoga kruha. A znate kaj me najviše “smeta”. Marketingaši su zmislili neverojatna imena tim kruhima, sve su to “brendovi” z nazivom “domači”, “mamini” ili “bakini” kruhi kojima je teško odoleti. Mene donekle spašava kaj ja ostanjke kruha zmrzavam i za svaki obrok tostam i svojega i Đurinoga kruha. Tak si umišljamo da jedemo furt friškoga kruha. I da znate da smo se tak na to nafčili pa ne bežimo saki dan v pekaru i, kaj je najvažneše, nigda ne hičemo kruha osim ak ga ne skurim v tosteru. Imam na temu kruha jednu davnu anegdotu. Negda davno je k nama često znal v klet navračati  jen naš stareši pajdaš. Na stolu je narezan jeger i špek a mi bi ga pitali:”Čuj. Očeš beloga i kuruznoga kruha?” Njegov je odgovor bil munjevit: ”Beloga. Dosta sam se ja kuruznoga kruha najel za vreme i posle rata!”                                                                      Prosim lepo ne hičite kruha!

Pondelek

Juha/Glavno jelo: Povrtnopileči ragu
Desert: Naravno da bu kolača od jučer

Tork

Juha: Jedna Podravkina z vrečice
Glavno jelo: Špinat, pohani kruh, jajca na oko; ak ste jako gladni  spečite  krmenadle na naglo
Desert: Vočna šalata

Sreda

Juha: Koprova juha z kašicom
Glavno jelo:Pohana pileča krilca, pire, mešana šalata
Desert: Puding

Četrtek

Juha/Glavno jelo: Krmeča lopatica na saft, kuruzni žganci
Desert: Žemljača; naravno od staroga beloga kruha

Petek

Juha: Grahova krem juha z krutonima
Glavno jelo: Pečenice, dinstani grah z puno povrča, šalata od friškoga zelja
Desert: Čaša vina

Subota

Imal bum verojatno v goricama goste pa bu ovak
Predjelo: Moja pašteta i sirni namaz na tostanom kruhu
Glavno jelo: Mešani roštilj, standardni prilogi i bruskete; 
Desert: Đuro bu napravila nekakav kolač a piče prema raspoloženju gostiju

Nedela

Juha: Juha od goveđih kostiju
Glavno jelo: Junetina ala vild, zemerknedli, zelena šalataDesert: Pita od jagodi, kapučino

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.