Znate vi dragi moji onu: Svaki početak je težak. Tak je od navek bilo i nemremo tu nekaj puno promeniti. Malo strpljenja i bumo pak došli na svoje.Poznate je da neki ljudi imaju mali otpor prema nekim novim stvarima, prema promenama, pogotovo ak su malo stareši kak ja. Navek ostaje ono:“Negda smo to ovak delali“. Mladi se lakše prilagode, dapače očeju navek „nekaj novo“ i onda ni čudo kaj od navek postoji ono kaj se zove „sukob generacija“. Tak vam je i z našom Coolinarikom. Odgovorni ljudi su odlučili napraviti redizajn a na nama je da se prilagodimo. Potrajalo je tjedan-dva da „otkrijemo“ v čemu je promena i nadam se da bu za koj dan sve selo na svoje.
Nova Coolinarika-stari bloger
Fakat sam bil malo zgubljen ovih tjedan-dva dok nismo došli na svoje. Onda sam išel poiskati kaj ima sve novoga v našoj „Coolinariki“ i drago mi je kaj sam se prepoznal v tim novostima. Zapraf mi se čini da sam bil vidovit i da sam pomalo inovator. Naišel sam na onu rečenicu gospođe Marinke Akrap „Lakše je skuhat neg smislit“ kaj je pred otprilike deset let bil i moj moto za pisanje ovoga bloga. Znate da naslov ovoga bloga „A kaj da danas kuham?“ nije moj originalni naslov nego je to rečenica moje mame Marice od koje sam čul taj vapaj stotinu put. To sam čul i od puno ženica v tih deset let koje mi znaju zafaliti kaj im dam ideju jer ni lako kuhati za veču družinu v kojoj svaki ima nekakvu svoju posebnu želju. Moja bi to mama ovak rekla:“Draga moja suseda.Of neče ovo jesti, on neče ono jesti i to mi je največa muka“. Ja sam to na kolko-tolko dobar način rešil. Naravno da navek mora biti i kompromisa a nesme biti vu familiji nezadovoljnih. Zapraf je ovaj moj naziv bloga inačica kaj sam našel v prezentaciji nove Coolinarike:“Što da danas kuham?“ Dobro je rekla gospođa Akrap da se na ovim prostorima Lepe Naše razmemo i dok se veli rajčica, pomidor ili paradajz. Mi smo si zapraf svi nekak susedi, moremo se razmeti bez problema samo ako baš ne nabasate na nekoga z Bednje. Ima vam primera da se v nekim podravskim susednim selima drukčeše zove krumpir. Tak morete čuti komper, glomper ili kalamper a svi znamo kaj to je. Za sva ova leta nisam primetil da me neko baš ne razme osim kaj me pred par let jedna gospođa zamolila da joj objasnim kaj su to drape? A to su vam samo kokošje nogice koje navek dobro dojdu v juhi a dost mojih poznatih znam koji ih obožavaju poglodati.
Coolinarika traje osamnajst (18) let kaj znači da je punoletna a eto ja sam tu več za koj dan punih deset let. Pa kaj to ni uspeh za jednog ozbiljnog gospona, kuhara amatera? Više sam nego sretan kaj to delam i verujte još navek z velkim zadovoljstvom. Kak je to nekak i nastavak one mega popularne emisije „Male tajne velikih majstora kuhinje“ mislim da je to jedna prelepa tradicija Podravkine gastronomije. V toj sam emisiji sudeloval samo kakti konzument. Još kak Podravkaš sam znal kad se ta emisija snima i nekak bi mi se baš „slučajno“ dogodilo da drugi dan moram „službeno“ v Zagreb i najdem se v popularnom „Centru“ v Berislavićevoj. Oni kaj se razmeju v snimanje emisije znaju da se navek mora puno toga više pripremiti pa navek ima nekakvih „ostanjki“ za drugi dan. Baš sam navek užival v tim „ostanjkima“.
Jako mi je drago prečitati kak Coolinarika ima najvekši broj recepti na svetu makar ja v tome ne sudjelujem. Svi kaj čitaju moje tekstove znaju da sam usmeren na priču i jelovnik a tu i tam spomenem nekakvoga recepta. No zato rado zavirim na Coolinariku dok kuham nekaj novoga od meni malo slabeše poznate namirnice. Tak sam nedavno malo pregledal kaj delati z fileom od friškoga bakalara jer to fakat retko imam prilike pripremati.
Za jednu sam stvar „majstor“. Naime na tekstu promocije Coolinarike se spominje i kuhanje z onim kaj vu frižideru „ima/nema“. To sam usavršil. Pogotovo juhe. Ništ me nemre iznenaditi. Navek v onoj velkoj taperver posudi imam mrkve, peršuna i celara, v podrumu se najde krumpira. Pri ruki mi je navek tuba paradajza, vrečica Podravkinog kopra a najde se brašna i slatke paprike za prežganu juhu. Skoro kak v pravilu posle nedelnog obeda mi zna ostati višak povrča z juhe i to mi je za pondelek materijal za finu krem juhu. Ono pak kaj vu frižideru navek stoji su Podravkine kocke za juhu da Vegetu i ne spominjem. Nedaj bože da toga nestane. Mam je „panika“ kak doma tak i v goricama.
Svih sam ovih leta stekel još jednu korisnu naviku. Kak ja delam jelovnik za celi tjedan tak si planiram i listu za kupovinu namirnica. Jako pazim da imam na zalihi za tjedan dana kojekakvoga mesa, tu i tam ribe, recimo lignje, i povrče od poznate kumice. Nekaj duže mi traje meso posle kolina ili pak piletina koju kupujemo od poznate ženice a ona nam javi kad je klanje piceki. Đuro kak hrčak skuplja materijala za kojekakve kolače. Moram vam reči da negda preteruje z tim zalihama za kolače a dok se ja srdim navek čujem jednu te istu rečenic:“Kaj bu ja bežala saki čas v dučan dok mi nekaj treba?“ Nemrem si pomoči: šuti i trpi. No ima tu i jedna kvaka dok se ide v šoping vu velke trgovačke centre.Skoro v pravilu idemo samo po neke „sitnice“, zememo samo košaru a nakon par minuta več smo svatili da nam zapravo trebaju kolica. I onda sledi ono:“Kaj ti nisam rekel da mam zemeš kolica?“ Verujte da su velki centri i jako velka opasnost za kučni buđet. Situaciju spašavaju kartice. Barem tak dugo dok ne dojde račun.
Takvu istu kolumnu imam i v našem Glasu Podravine i Prigorja pa me moji poznati i neki suradnici znaju pitati da otkud mi ideje za pisanje? Pa ljudi dragi furt se oko nas nekaj događa a dok imate tolko let kak ja, i još navek kolko-tolko dobro pamtite, ideji nebu falelo. Osim toga mene pisanje na tu temu baš zapraf veseli. Barem nekaj v ovim nesretnim vremenima.
Nekaj vam moram reči za kraj. Ono kaj pročitate v mojem životopisu na početku teksta je več dost zastarelo. Em sam deset let stareši, em više ne delam v pofesiji niti povremeno, em se oko mene, kak i oko vas, puno toga promenilo. Ono kaj me baš jako rastuži su odlaski nekih mojih dragih pajdaši z kojima sam provel lepi dio svojega života. Jedina je moja sreča kaj si navek znam najti kojekakvu zanimaciju koja čoveku skrene misli z ovih čudnih događaja oko nas.
Pondelek
Opče na razmišljam o kuhanju. Moje dugogodišnje iskustvo mi govori da bu ostanjki i više nego za jedan dan. Ponovil bum jelovnik i za fruštuk i za obed od jučer samo kaj bum zakuhal juhu z friškom testeninom i napravil novoga priloga z janjetinom. Naravno da znate kak bu i viška kolači.
Tork
Juha/Glavno jelo:Kisela juha od pilečega sitniša
Desert: Sok i opet sok
Sreda
Juha: Prežgana juha z jajcima i krutonima
Glavno jelo: Krmenadli z češnjakom, hajdinska kaša, cikla
Desert: Čaša crne pive
Četrtek
Juha/Glavno jelo: Čušpajz od mahuni, domače kobase; moreju biti dobre i kranjske
Desert: Palačinke z pekmezom
Petek
Juha: Juha od zmrznutoga osliča z rižom
Glavno jelo: Kuhani oslič, blitva
Desert: Čaša vina
Subota
Kak sad stvari stoje imal bum v goricama težake: Jan i njegvi dečki
Malo predjelo: Kobase, špek, jeger, malo sira i klipiči
Glavno jelo: Vinski gulaš; to obožavaju al ga bum složil od čistoga bočinga
Desert: Kaj drugo nego gemišt
Nedela
Juha:Anjgemahtec
Glavno jelo: Pohane bockice i krilca, pire, zelena šalata
Desert: Diganci z makom i ružičkima
:(Još nema komentara